Әр қадамы – мотивация, бағындырған шыны – нәтиже

Қазақта «Сегіз қырлы, бір сырлы» деген жақсы сөз бар. Елден ерек туған, ерекше қабілетімен, өзгеше болмысымен жаратылған адамдарға қатысты айтылатынын білеміз. Өзі жас болса да, игі істер жасап, азаматтық ұстанымы жоғары, қайырымдылыққа құштар бозбала жігіт туралы сыр шерткіміз келіп тұр. Кейіпкеріміз – Макинск қаласындағы мектеп-лциейінің 10 сынып оқушысы, «Nur Otan» партиясының «Jas Otan» Жастар қанатының белсендісі, еріктілер тобының мүшесі Әлішер Молдахметов.

Әлішер – отбасында жалғыз бала. Ата-анасы оған бар жылулығын, зор махаббатын сыйлап, ерекше мейірімін төгіп өсіріп келеді. Бірақ жалғыз баламын, дүниенің барлық қызығы өзіме қана тиесілі деген ойдан аулақ Әлішер айналасындағылармен жақсы қарым-қатынас құрып келеді. Өзімшілдік мінез жоқ, керісінше әрдайым үлкенге құрмет, кішіге ізет көрсетіп, үй шаруасына белсенді араласып, мектепте де алдыңғы шепте болуға тырысады. Бірінші сыныптан бастап Әлішердің білім үлгерімі жоғары, сондықтан 9 сыныпты ол үздік аттестатпен аяқтап, ата-анасының қана емес, барша мектептің мақтанышы болып табылады. Ал мадақтауға шынымен де негіз көп. Жастайынан білімге құштар, зейіні зерек оқушының ұстаздармен тез тіл табысып кететін тылсым қабілеті бар, сонын арқасында ол гуманитарлық та, жаратылыстану циклдің піндерін бірдей жақсы меңгеріп жүр. Оған дәлел – мектепішілік, аудандық пән олимпиадаларға үнемі қатысып, жақсы нәтиже көрсетуі. Сонымен қатар, Әлішер қосымша білімге де бейімді. Орта буында ол робототехникамен әуестене бастады. Информатика пәнінің мұғалімі Өмірбай Сандалдың жетекшілігімен Әлішер робототехниктер командасына еніп Қарағанды және Талдықорған қалаларында өткен «RoboLand 2017», «RoboLand 2018» робототехника, бағдарламалау және инновациялық технологиялар Халықаралық фестиваліне қатысты. Кіндігінің қаны тамған қойнауы бай, төскейі құт Бұланды жерінің тарихы де Әлішердің назарынан тыс қалмады. Өлкетану ісіне қызығушылық танытқан жас оқушы аудандық мұражайға жиы барып, туған жер туралы зерттеу материалдарымен танысып, өзінің білімін молайтты. Ал облыстық жас өлкетанушы-зерттеушілер фестиваліне қатысқаны үшін сертификатпен марапатталды.

Әлішердің тағы бір маңызды әуестіктерінің бірі – спорт. 2017 жылдан бастап ол Макинск қаласында мамандандырылған балалар мен жасөспірімдер спорт мектебінің бокс секциясына қатысуда. «Шынықсаң шымыр боласын» деген ұстанымды алға тартқан жас спортшы дайындықтарға бар жауапкершілікпен қарайды. Бір емес бірнеше таланты спортшы дайындаған тәжірибелі бапкер-ұстаз Дәулетхан Амантаевтың жетекшілігімен Әлішер Қарағанды қаласында өткен Республикалық бокс турнире қатысып, вице-чемпион атанды. Ал Өзбекстан, Ресей, Қырғызстан және Қазақстан спортшыларын ортақ шаршы алаңға жинаған Халықаралық бокс турнирінде Әлішер 3 орын иеленіп, спорт шеберіне кандидат атағын алды.

Әлішердің көпқырлылығы тиісті мадаққа лайықты. Өйткені ол оқу үздігі болуымен қатар, спортпен кәсіби деңгейді айналысып, жаңа технологияларды меңгеріп қана қоймай, қоғамдық бастамаларда да өзінің белсенділігін танытып келеді. Екі жылдай ол аудандық Жастар ресурстық орталығының ұйымдастырумен өткен іс-шараларға қатысып, еріктілер қатарына енді. Биылғы Еріктілер жылы аясында өтіп жақтан маңызды акцияларда Әлішер сияқты азаматтық ұстанымы жоғары жастар өздерінің қоғамда орын алып жатқан оқиғаларға немқұрайлы қарамайтындарын көрсетті. Нақтырақ айтқанда, пандемия кезінде ұйымдастырылған әлеуметтік маңызы жоғары іс-шараларға қатысып, өздерін қоғамның айнымас бір бөлігі екенін дәлелдегені. Ал тағы да бір айта кететін жайт, «Балдәурен» Республикалық оқу-сауықтыру орталығында Әлішер Молдахметов Қазақстан Республикасының патриоттар қатарына енгізіліп, «Елжанды патриот» атты медалімен марапатталып, сертификат иеленді.

Шын мәнінде, жастар – қоғамның қозғаушы күші, елдің болашағы. Ал осындай жігерлі, білімді, іздемпаз, талапты және жаны мейірім мен ізгілікке даяр тұратын жастардың қатары молайған сайын болашағымызға деген сенім нығая түсері сөзсіз. Әрине, лайықты ұрпақты қатыптастыру үшін жастарға мемлекет тарапынан сапалы білім алуға, жан-жақты дамуына, қабілетін жетілдіруге қомақты қолдау қажет. Сонда бүгінгі озық ойлы, қайсар мінезді, рухы мықты жалынды жастарымыз елін әрқашан мақтан етіп, болашағы үшін аянбай еңбек етеді.

Айгүл Аманжолова, Бұланды ауданы.