«Жақсылық адамдарды біріктіреді»: корпоративтік волонтер Байдүйсен Жұлдызаймен сұхбат

Шабытты ең күтпеген жерден табуға болады — тіпті әлеуметтік желідегі жаңалықтар таспасынан. Дәл осылай Байдүйсен Жұлдызай Медетқызы корпоративтік волонтерлікке келген. Ол — «ҚТЖ – Жүк тасымалы» ЖШС филиалы («Қарағанды жүк тасымалы бөлімшесі») жетекші инженер-технологы. Балаларға қуаныш сыйлаған, қарттарға қамқор болған адамдардың оқиғалары оның жүрегінде ізгі істерге деген ерекше құлшыныс оятқан. Бүгінде Жұлдызай тек волонтерлік бастамаларға белсенді қатысып қана қоймай, пікірлестер тобымен бірге ірі әлеуметтік жобаларды да дамытып жүр.

— Жұлдызай, корпоративтік волонтерлікке қалай келдіңіз?

Мен корпоративтік волонтерлікке әлеуметтік желіден тапқан шабыт арқылы келдім. Жаңалықтар таспасын парақтап отырғанда жиі адамдардың игі істері жайлы әсерлі оқиғаларды көретінмін: біреу балалар үйіндегі балаларға мереке ұйымдастырады, біреу қарттарға азық-түлік пен қамқорлық сыйлайды, тұтас волонтерлер тобы апаттан кейін үйлерді қалпына келтіреді немесе саябақты тазалайды. Ол сәттердегі шынайы эмоциялар — күлкі, ризашылыққа толы көзқарастар — менің жүрегімде ерекше бір сезімді оятты.

— Компания аясында қандай бастамаларды жүзеге асырып жүрсіздер?

Біз өмірін темір жолға арнаған зейнеткерлерге қолдау көрсетеміз: хал-жағдайын сұрап барамыз, мерекелермен құттықтаймыз, олардың еңбегіне алғыс айтамыз. Балалар үйіндегі тәрбиеленушілерге де көп көңіл бөлеміз — мерекелер ұйымдастырамыз, шығармашылық шеберлік сабақтарын өткіземіз, қуаныш пен мейірім сыйлаймыз.

Қазір біз пікірлестермен бірге «Балалардың көзімен темір жол» атты жобаны іске асырып жатырмыз. Оның мақсаты — оқушыларға теміржолшы мамандығының маңызын көрсету, сонымен бірге теміржол бойында қауіпсіздік ережелерін үйрету. Біз балалардың темір жолға тек қызығушылықпен ғана емес, жауапкершілікпен де қарағанын қалаймыз.

— Волонтерлік сізге жеке өзіңізге не береді?

Бұл — мен үшін ерекше қуат пен шабыт көзі. Жеке деңгейде — жақсылық жасау, адамдардың күлкісін көру, көмегімнің маңызды екенін сезіну. Ал кәсіби тұрғыда волонтерлік менің көшбасшылық қасиеттерімді, командада жұмыс істеу қабілетімді, ерекше жағдайда тез шешім қабылдауды дамытады. Мұндай тәжірибені кеңседе алу мүмкін емес — ол тек адамдармен тікелей қарым-қатынаста қалыптасады.

— «Қазақстан темір жолы» компаниясында корпоративтік волонтерлік ұжымға қалай әсер етеді?

«Қазақстан темір жолы» АҚ-да қызметкерлердің волонтерлік бастамаларға қатысуы ұжымды біріктіреді, өзара көмек пен сенім атмосферасын қалыптастырады. Әріптестер жай ғана жұмыс серіктестері емес, әлемді жақсы жаққа өзгертуге дайын пікірлестерге айналады. Бұл корпоративтік рухты нығайтып, мотивацияны арттырады және компания үшін мақтаныш сезімін қалыптастырады.

— Есте ерекше сақталған сәт бар ма?

Иә. Біз қарттар үйіне барып, шағын концерт қойып, қарттармен әңгімелестік. Іс-шарадан кейін бір әже қолымды ұстап тұрып: «Балаларым, бізді ұмытпай келгендеріңе рақмет» деді. Сол қарапайым сөздер жүрегімді терең толқытты. Сол сәтте мен мұндай кездесулердің тек біз көмектесетін адамдар үшін ғана емес, өзіміз үшін де қаншалықты маңызды екенін ерекше сезіндім.

— Компания волонтерлерге қандай қолдау көрсетеді?

Бізде барлық жағдай жасалған: ресурстар, көлік, материалдар, ақпараттық қолдау беріледі. Қызметкерлер акцияларға жұмыс уақытында да қатыса алады, егер олар республикалық немесе корпоративтік бастамалар аясында өтсе.

Жыл сайын Корпоративтік волонтерлер мектебі (КВМ) өткізіледі. Онда белсенді қызметкерлер оқудан өтіп, тәжірибе алмасып, жаңа жобалар жасайды. Жыл соңында үлкен форум ұйымдастырылып, үздік волонтерлер түрлі номинациялар бойынша марапатталады: «Таза Қазақстан», «Балаларға қамқорлық», «Қарттарға қамқорлық» және басқалары. Бұл — еңбекті мойындау әрі мықты ынталандыру.

— Волонтерлікті енді ғана ойлап жүргендерге қандай кеңес берер едіңіз?

Алғашқы қадамнан қорықпаңыздар. Волонтерлік — мінсіз болу туралы емес, шын жүректен көмектескісі келу туралы. Бірден ауқымды істерден бастау міндетті емес — акцияға қолдау білдіру, шағын шараға қатысу жеткілікті. Жақсылық адамдарды біріктіреді. Бастасаңыз болды — сіз үлкен игі қозғалыстың бір бөлігіне айналасыз.

— Сіздің ойыңызша, корпоративтік волонтерліктің қоғамдағы рөлі қандай?

Бұл — бизнестің тұрақты дамуға және қоғамдағы оң өзгерістерге нақты үлес қоса алатын қуатты құралы. ҚТЖ-да әр жоба — балаларға көмек, табиғатты қорғау немесе қарттарға қолдау — жауапты әрі үйлесімді қоғамға қарай жасалған қадам.

Волонтерлік мейірім, құрмет пен саналы мәдениетті қалыптастырады, бизнес пен қоғам арасындағы сенімді нығайтады. Ол тікелей Тұрақты даму мақсаттарымен байланысты: қоршаған ортаны қорғау, білім мен денсаулық сапасын арттыру, теңсіздікті азайту. Бұл — елдегі әлеуметтік мәселелерді шешудің бір бөлігіне айналған бизнестің болашаққа қосқан үлесі.

@qazvolunteer.kz