Ұйым туралы

Әр істің басында үлкен мақсат емес, кішкентай ғана жүректен шыққан ниет тұрады деп ойлаймын. Өзім басқарып отырған қор арқылы халыққа қолдау көрсетіп, қоғамға пайда тигізуді басты парызым санаймын. 

2020 жылдан бастап бүгінгі күнге дейін «Ай шуақ» қайырымдылық қорының директоры қызметін атқарып келемін. Осы уақыт ішінде қор арқылы талай әлеуметтік, мәдени және қайырымдылық жобаларды жүзеге асырып, тұрғындарға қолдау көрсетуді басты мақсат етіп келеміз.

2022 жылдан бері «AMANAT» партиясының мүшесімін. Ал бұған дейін, 2019 жылдан бастап «Жастар рухы» жастар қанатында белсенді жұмыс істеп келемін.

2020 жылы партияішілік праймеризге қатысып, саяси додада бақ сынадым. Бұл тәжірибе маған жаңа серпін беріп, саяси көзқарасымның нығаюына үлкен әсер етті. 2021 жылы «Nur Otan» партиясы Маңғыстау облыстық филиалы жанындағы отбасы, әйелдер және балалардың құқықтарын қорғау мәселелері жөніндегі аймақтық қоғамдық кеңестің төраға орынбасары қызметін атқарып, кеңес жұмыстарының тиімді жүзеге асуына атсалыстым.

2022 жылы «AMANAT» партиясы Жастар қанатының кезектен тыс VI Съезіне делегат ретінде қатыстым. Сол жылы Қостанай облысындағы өрттен зардап шеккен тұрғындарға өзім басқаратын қайырымдылық қор атынан, «Жастар рухы» жастар қанатының Маңғыстау облыстық филиалымен бірлесіп, гуманитарлық көмек ұйымдастырдық.

Сонымен қатар, Маңғыстау облысының кәсіпкерлік және сауда басқармасының мемлекеттік бағдарламалар бойынша комиссиясының, сондай-ақ Ақтау қалалық жұмыспен қамту орталығы жанынан құрылған грант бөлу комиссиясының мүшесі болдым. Бұл міндеттерде қоғамға пайдалы шешімдер қабылдап, жастар мен әлеуметтік топтардың мүмкіндіктерін кеңейтуге үлес қосуға тырыстым. 

Қазіргі таңда Маңғыстау облыстық Қоғамдық кеңестің мүшесі ретінде өңірдің әлеуметтік-экономикалық дамуына, халықтың әл-ауқатын арттыруға бағытталған ұсыныстар мен бастамаларды қолдап, қоғамдық бақылау ісіне белсенді қатысып келемін.

2020 жылы пандемия кезінде халыққа қиын болған сәтте қор мүшелерімен бірге тұрғындарға дәрі-дәрмектер, антисептиктер, бетперделер тараттық. Сол уақытта Маңғыстау ауданының ауруханасына ИВЛ аппаратын табыстадық. 90-ға жуық дәрігерді ыстық тамақпен қамтамасыз етіп, Шайыр ауылының амбулаториясына 1 200 000 теңгеге қажетті құрал-жабдықтар жеткіздік.

2022 жыл Балалар жылы болғандықтан, мүмкіндігі шектеулі балаларға арнап «Бақытты балалық шақты қорғау» атты қайырымдылық концертін ұйымдастырдық. Сонымен бірге, жыл сайынғы дәстүрге айналған «Мектепке жол» акциясына белсене қатысып келеміз. Соның нәтижесінде осы күнге дейін мұқтаж отбасылардың 2000-ға жуық баласына толық мектеп сөмкелері мен оқу құралдарын сыйға тарттық.

Әлеуметтік осал топ мүшелерін де назардан тыс қалдырған емеспіз. Солардың ішінде ерекше есте қалған іс-шараның бірі – Сайөтес ауылында тұратын мүмкіндігі шектеулі екі отбасыға және Ақтау қаласындағы №3 арнаулы әлеуметтік қызмет көрсету орталығының екі тәрбиеленушісіне демеушілер көмегімен барлығы 4 электронды арба (құны 750 мың теңге) сыйға тартуымыз болды.

2023 жылы «Жастар тағылымдамасы 0.3» бағдарламасына қатысып, Алматы қаласы мен Әзірбайжан Республикасында тағылымдамадан өттім. Сол сапар барысында әлеуметтік саланың әртүрлі бағыттарымен танысып, жобаларды басқару, қоғаммен байланыс орнату және әлеуметтік мәселелерді шешу бойынша мол тәжірибе жинадым.

2023–2024 жылдары «Мектепке жол» акциясын жалғастырып, аз қамтылған отбасылардың балаларына мектепке қажетті құрал-жабдықтарды табыстадық. «Қарттарды ардақтайық» жобасы бойынша қарттар үйіне барып, 8-наурыз, 22-наурыз мерекелерінде дастархан жайып, сыйлықтар ұсынып, үлкендерге қуаныш сыйладық.

Балаларды қорғау күні де назардан тыс қалмады: облыстық балалар үйіне барып, тәттілер, ойыншықтар, киім-кешектер мен тұрмыстық заттар табыс еттік. Ал 2024 жаңа жылдық мерекесін 120 ерекше баламен «Айша» сарайында атап өтіп, оларға арнап концерттік бағдарлама мен сыйлықтар ұйымдастырдық.

Сол жылы «Saraishyq Upgrade-2024» халықаралық жастар форумына қатысып, «Жасанды интеллект» бағыты бойынша тәжірибе алмасуға белсенді атсалыстым. Бұл форумда саладағы соңғы жаңалықтармен танысып қана қоймай, жетекші мамандармен, түрлі елден келген жастармен байланыс орнатып, жаңа идеяларды талқыладық.

2024 жылы Атырау облысындағы су тасқынынан зардап шеккен тұрғындарға тәулік бойы (24/7) волонтерлік көмек көрсетіп, қол ұшын создық.

Сонымен қатар өзім басқарып отырған қайырымдылық қоры арқылы 10 жүкті әйелге арнайы «роддом сөмкесін» дайындап бердім. Бұған қоса, 800-ге жуық тұрғынға 800 дана тұрмыстық шелек, оқтау-тақтай, шампунь, сабын, сүлгі сияқты күнделікті қажетті заттарды жеткізіп бердік.

2025 жылдың наурыз айында Облыстық отбасылық үлгідегі балалар ауылына барып, тәрбиеленушілермен тоғызқұмалақ ойынын ойнап, оларға сыйлықтар табыстадық. Ал 1-маусым – Халықаралық балаларды қорғау күніне орай бүлдіршіндерге түрлі ойыншықтар сыйладық. 

2025 жылдың сәуір айында Ақтау қаласында өткен «Ақтау – Түркі әлемінің мәдени астанасы – 2025» халықаралық шарасында 100 волонтердің координаторы ретінде 6 күн бойы қызмет атқардық. Бұл ауқымды шара барысында волонтерлердің жұмысын ұйымдастырумен қатар, тілмаштық қызметін де орындадық.

Тамыз айында «Мектепке жол» акциясы аясында 30 балаға мектеп сөмкелері мен қажетті құрал-жабдықтарын үлестірдік.