Нұр-Сұлтан, BAQ.KZ тілшісі. Ақмола облысында волонтерлер Екінші дүниежүзілік соғысқа қатысқан ардагерлерге қажетті дәрі-дәрмек, азық-түліктер жеткізіп берді.
Елбасы бастамасымен қолға алынған қайырымдылық акциясының ауқымын кеңейтіп, қолдау көрсеттік. Еліміздегі төтенше жағдайға байланысты қайырымдылық акциясын ұйымдастырдық. Бүгін Көкшетау қаласында екі ардагердің үйіне бардық. Оның біреуі – 96 жастағы Василий Горбонос. Оған қымбатты дәрі-дәрмектер апарып бердік. Осының алдында өзі бізге хабарласып, қолдау көрсетуімізді сұраған. Өзінің қымбат медициналық дәрі-дәрмектер алуға мүмкіндігі жоқ. Сондықтан бүгін антесептик, витаминдер, сүт тағамдарын, жеміс-жидек және бірінші кезекте қажетті азық-түлік түрлерін апардық. Екіншісі – 95 жастағы Николай Дериглазов. Оған да дәл солай. Мұның алдында біздің қолдау көрсетуімізді қызы өтінген болатын. Бұл ардагерімізге де дәл солай Горбоносқа апарғандай медициналық маска, антисептик, витамин және азық-түлік жеткізіп бердік. Дериглазов сонымен қатар, үйіне жөндеу жұмыстарын жүргізуді өтінді. Біз оған көмектесеміз. Сондай-ақ біздің достарымыз Бурабайда да осы акцияны жалғастырды. Ол жақта тұрмысы төмен отбасыларға бірінші кезекте қажетті тауарлар сатып әперді, - дейді Ақмола облыстық ҚХА ассамблеяның еріктілер қозғалысы орталығының жетекшісі Умар Шоназаров.
Айта кетейік, кеше Ақмола облысының волонтерлері денсаулық жағдайы бойынша есепте тұрған адамдарға қажетті дәрі-дәрмекті үйіне жеткізіп берген болатын.
#bizbirgemiz акциясы шеңберінде қолға алынған акцияның мақсаты - коронавирус инфекциясының таралу қаупі жағдайында азаматтардың байланысын барынша шектеу. Қайырымдылық акциясына қолдау көрсетіп біздің медицина саласындағы қызметкерлеріне көмектесу.
